Við bjóðum barnið þitt velkomið í sumarbúðir KFUM og KFUK í Vindáshlíð. Það er markmið okkar að barninu líði vel í sumarbúðum okkar.

Hér eru nokkrar hagnýtar upplýsingar

1. Farangur
Eftirfarandi upptalning gefur hugmynd um nauðsynlegan farangur:
Sæng eða svefnpoki, koddi, lak, regnföt, úlpa, stígvél, íþróttaskór, lítill bakpoki og vatnsbrúsi f. lengri gönguferðir, inniíþróttaskór, nærföt, nægir sokkar, peysur, trefill, húfa, vettlingar, buxur, spariföt, sundföt, handklæði, sápa, tannbursti, tannkrem og Nýja testamenti. Ekki er þvegið af börnunum í sumarbúðunum. Sælgæti má ekki taka með í Vindáshlíð.
ÁRÍÐANDI: Fólk er beðið um að takmarka farangur við nauðsynlega hluti og láta fara eins lítið fyrir sængurfötum og kostur er vegna pláss í rútu.

2. Fatamerking
Áríðandi er að merkja greinilega allan farangur og töskur með símanúmeri þátttakenda. Föt og aðrar eigur þátttakenda eru á ábyrgð þeirra sjálfra og verða ekki bættar ef eitthvað glatast eða skemmist. Gott er að gera nákvæman lista yfir farangur barnanna til að auðvelda þeim að pakka niður til heimferðar.

3. Óskilamunir
Hægt er að vitja óskilamuna í Þjónustumiðstöð KFUM og KFUK við Holtaveg 28. Eftir 1. október áskilja sumarbúðirnar sér rétt til að ráðstafa ósóttum óskilamunum. Vegna þess hve mikið hefur verið um óskilamuni síðastliðin ár viljum við brýna fyrir foreldrum að nálgast óskilamuni eins fljótt og auðið er.

4. Lyf/læknisvottorð
Ekki þarf að koma með læknisvottorð, nema eins og segir í reglugerð: „Þeim börnum sem eiga við einhvers konar veikindi að stríða skal fylgja læknisvottorð þar sem fram komi upplýsingar um veikindin og skýr fyrirmæli læknis um meðferð, lyfjagjöf o.s.frv.“ Ef barnið tekur lyf, látið skriflegar leiðbeiningar fylgja með lyfinu og afhendið starfsmanni sumarbúðanna við brottför. Það sama á við ef eitthvað annað sérstakt gæti skipt máli varðandi heilsu barnsins og líðan.

5. Brottför – heimkoma:
Farið er frá húsi KFUM og KFUK, Holtavegi 28, kl. 9:00 að morgni og heimkoma er á sama stað um kl. 16.00. Þeir sem kjósa að koma með og/eða sækja börn sín í sumarbúðirnar, í stað þess að nýta sér rútuferð, komi ekki með börnin fyrr en kl. 10:00 þann dag sem dvöl hefst og sæki þau ekki seinna en kl. 15:00 á brottfarardag. Athugið að nauðsynlegt er að hafa samband við Þjónustumiðstöð KFUM og KFUK í síma 588-8899 ef forráðamenn velja að fylgja börnum í sumarbúðirnar, og tilkynna það.

6. Athugið
Vegna hættu á skemmdum eða slysum er þátttakendum óheimilt að hafa með sér hnífa eða önnur hættuleg tæki í sumarbúðirnar. Þátttakendur eru skaðabótaskyldir vegna skemmda sem þeir kunna að valda. Síma og önnur dýr tæki er einnig óheimilt að taka með. Sælgæti er ekki leyfilegt í Vindáshlíð.

7. Myndbirting
KFUM og KFUK á Íslandi áskilur sér rétt til notkunar á myndum af þátttakendum í starfi og viðburðum á vegum félagsins. Félagið mun hafa að leiðarljósi að gæta varúðar og nærgætni við myndbirtingar í samræmi við leiðbeinandi álit persónuverndar.

8. Fyrirspurnir
Ef foreldrar vilja spyrjast fyrir um börn sín á meðan á dvölinni stendur er hægt að hringja í síma 566 7044 og ræða við starfsfólk. Símatími er kl. 11:30-12:00. Vinsamlega athugið að heimsóknir til barnanna eru ekki æskilegar. Fréttir og myndir úr sumarbúðunum verða birtar hér á heimasíðunni og á fasbókarsíðu sumarbúðanna.

9. Annað
Vindáshlíðar bolir og töskur eru til sölu í Vindáshlíð og kostar bolur kr. 2.500 og taska kr. 1.800. 
Geisladiskar með Vindáshlíðarlögunum verða seldir á meðan birgðir endast, diskurinn kostar kr. 1.500. Einnig eru seld kort með myndum af Vindáshlíð og frímerki ef börnin vilja senda til vina og ættingja. Verð fyrir kort er 100 kr. og fyrir frímerki 100 kr. eða samtals 200 kr.

Hægt er að lesa um sögu Vindáshlíðar í bókinni Hér andar Guðs blær sem er til sölu í Þjónustumiðstöð KFUM og KFUK á 1.000 kr.

Athugið að nauðsynlegt er að hafa samband við Þjónustumiðstöð KFUM og KFUK í síma 588-8899 ef forráðamenn velja að fylgja börnum í sumarbúðirnar, og tilkynna það.